លោក Antonio Conte ហាក់មិនអស់ចិត្តនោះឡើយ ដែលក្រុម Tottenham Hotspur (Spurs) ប្រកួតចាញ់ក្រុម Sporting CP តែបានលើកឡើងថា ការរងបរាជ័យរបស់ពួកគេនេះ គឺជាការរំឭកពីភាពចន្លោះប្រហោងផ្នែកខ្លះ ដែលនាំឱ្យមានកំហុស សម្រាប់ការប្រកួត នៅក្របខ័ណ្ឌ Champions League កាលពីយប់ថ្ងៃអង្គារនេះ។

ក្រុម Spurs មានកម្រិតទាបជាង ក្នុងការប៉ះជាមួយក្រុមគូបដិបក្ខ Sporting ប្រចាំពូល D របស់ពួកគេនេះ តែមើលទៅហាក់បានត្រៀមខ្លួនបែងចែកពិន្ទុរួចជាស្រេច ពីការលេងមិនសូវល្អរបស់ខ្លួន ក្នុងហ្គេម នៅកីឡដ្ឋាន Estadio Jose Alvalade នេះ។

តែគ្រប់យ៉ាងកើតឡើងត្រឹមតែ ១ប៉ប្រិចភ្នែក ដោយការតែតបាល់បញ្ចូលទីនៅនាទីទី៩០+១ របស់កីឡាករ Paulinho ពីជ្រុងក្បែរបង្គោលទី និងការស៊ុតបាល់បញ្ចូលទីយ៉ាងល្អពីកីឡាករ Arthur Gomes នៅនាទីទី៩០+៣ បានផ្តល់ឱ្យក្រុមម្ចាស់ផ្ទះ Sporting នូវជ័យជម្នះ ដែលជាការផ្ដល់ការខកចិត្តយ៉ាងខ្លាំងដល់ក្រុមយក្សទៅពីអង់គ្លេស។

ឥឡូវនេះ ក្រុម Spurs មានការងារជាច្រើន ដែលត្រូវធ្វើ ក្នុងការប្រកួតទាំង ២លើកនាពេលបន្ទាប់ជាមួយក្រុម Eintracht Frankfurt បន្ទាប់ពីមិនអាចសម្រេចបាននូវលទ្ធផល ដែលលោក Conte មិនបានចាត់ទុកថា ជាការឆ្លុះបញ្ចាំងពីទម្រង់លេងរបស់ក្រុមលោកនោះឡើយ

លោក Conte បានប្រាប់សន្និសីទសារព័ត៌មានថា៖ «ខ្ញុំគិតថា ការប្រកួត ក្នុវគ្គទី ១ គឺស្ថិតនៅក្នុងភាពប្រដំត្រសងគ្នា។ ហើយបើនិយាយតាមត្រង់ទៅ ក្នុងវគ្គទី២ យើងមានអារម្មណ៍ថា មានឱកាសទទួលបាន ៣ពិន្ទុ និងឈ្នះការប្រកួតនេះ។ យើងមានឱកាសស៊ុតបញ្ចូលទី តែចុងក្រោយ យើងកំពុងនិយាយពីការចាញ់ទៅវិញ។ ខ្ញុំគិតថា ប្រហែលជាយើងមិនសមនឹងឈ្នះទេ តែក្នុងពេលជាមួយគ្នា យើងក៏មិនសមនឹងចាញ់ទេ ក្នុងការប្រកួតយប់នេះ»។

«កម្រិត Champions League គឺខ្ពស់ណាស់។ អ្នកត្រូវដឹងថា អ្នកត្រូវតែកាត់បន្ថយកំហុស ព្រោះនៅទីបំផុត អ្នកអាចនឹងខាតបង់ ដោយសារកំហុសនោះ។ យប់នេះ យើងខាតបង់ច្រើនណាស់»។ លោក Coonte បានបន្ថែម៕